LA GAITA ASTURIANA

Ún de los instrumentos musicales más importantes d'Asturies ye la gaita asturiana. Esti instrumentu de vientu compónse de delles partes, que son fundamentales pa que la gaita emita soníos, y d'otres que tienen una función más decorativa.

Dalgues partes de la gaita son les siguientes:

-Soplete: ye'l tubu nel que s'introduz l'aire nel fuelle.

-Fuelle: espaciu de la gaita nel que s'almacena l'aire.

-Roncón: ye'l tubu más llargu de tola gaita que s'apoya sobre el costazu (hombro) del gaiteru.

-Copa: zona colocada nel estremu del roncón.

-Punteru: ye'l tubu onde van los furacos de la gaita pa tocar les estremaes (diferentes) notes.

-Payuela: encuéntrase situada un pocu per encima del punteru.

-Vistíu: ye la tela que decora a la gaita.

-Flecos: adornos compuestos por un conxuntu de cordeles que, per un llau tán apegaos, y pel otru déxense colgando.


Agora vais facer una actividá na que tenéis que marcar col ratón les partes d'una gaita asturiana. Si acertáis se vos pondrá la casiella de color verde, pero si vos equivocáis, la casiella tornaráse encarnada o colorada.
Pinchái na imaxe pa entamar: 

PROYECTU "LA COCINA": LA FRUTA

¿GÚSTAVOS LA FRUTA?

Pues nesti cantar de Pop Piquiñín, sal fruta a esgaya, de estremaos (diferentes) tamaños, colores, formes y sabores.

La canción titúlase “La fruta” y escribí equí debaxo la so lletra pa que nun tengáis dificultaes a la hora d’escuchala, porque ye verdá qu’hai vegaes nes que les voces van dalgo rápido.

LA FRUTA

La fruta,

la fruta,

dícente que comas fruta,

dícente que comas fruta,

la fruta fresco,

la fruta fresco,

la fruta viesca,

la fruta viesca.

La fruta,

la fruta,

y da-y cola fruta,

y da-y cola fruta,

en zume,

en zume,

en mermelada,

en mermelada.

La naranxa, el mangu, el quivi,

la sandía y el melón,

piña, frambuesa y pomelu,

mandarina y el cidrón.

La fruta,

la fruta,

que pesao cola fruta,

que pesao cola fruta,

los cítricos,

los cítricos,

la fruta seco,

la fruta seco.

La fruta,

la fruta,

pues nun ta mal la fruta,

pues nun ta mal la fruta,

en macedonia,

en macedonia,

la fruta tropical,

la fruta tropical.

Los miruéndanos, mazanes,

mores, limes y el llimón,

aguacates, caquis, figos,

uves, plátanu y fresón,

nectarina y el marmiellu,

y los dátiles y peres,

les cereces, les granaes,

chirimoyes y groselles.

La fruta.

Escucháu’l cantar, vamos facer un par d’actividaes percencielles rellacionaes cola fruta. Pinchái na imaxe:

 

SINGULAR Y PLURAL

Entamamos la selmana presentándovos a les mios mascotes

Estes imáxenes sirven como exemplu pa repasar los sustantivos singulares y los plurales.

Masculín singular: Perru

Masculín plural: Perros

Nel exemplu que vos punxi, perru al ser singular fina cola vocal "u". Sin embargu, perros, que ye plural, tien la mesma terminación que en castellán, fina en "os".

Lo mesmo pasaría con otros sustantivos masculinos, como por exemplu:

Pero ¿qué asocedería colos sustantivos de xéneru femenín?

Femenín singular: Pita

Femenín plural: Pites

Los sustantivos femeninos singulares suelen finar cola vocal "a". Pero los femeninos plurales terminen en "es"

Vamos repasar un pocoñín los singulares y plurales n'asturianu con esti exerciciu. Pinchái nel mensaxe.

DÍA DEL LLIBRU

Güei tamos a xueves 23 d'abril. ¿Suénavos de dalgo esta fecha?
Pues sí, el 23 d'abril ye'l día nel que se cellebra'l día del llibru. Esta fecha ye importante porque debemos pensar nos llibros como llaves, llaves máxiques que nos permiten abrir la puerta del conocimientu y de la fantasía.

El cuentín que vos voi proponer pa festexar esti día, titúlase "El misteriu de Xulia" y trata sobre una neña qu'empieza a notar un cambiu alredor suyu, cambiu que va influyir en tolos aspeutos de la so vida.

¿QUERÉIS SABER CUÁL YE ESI MISTERIU?

Pues adientrémonos nel llibru pa descubrilu. Pero enantes de entamar a lleer, echái un vistazu a esti vocabulariu pa entender meyor la llectura.

PROYECTU "LA COCINA": LA PIRÁMIDE DE LOS ALIMENTOS

Los alimentos son un elementu fundamental na nuestra vida. Necesitámoslos pa crecer fuertes y sanos, asina que debemos alimentanos bien. Pa ello contamos cola pirámide de los alimentos, un recursu que nos indica la cantidá y frecuencia cola qu'una persona sana debe consumir los distintos tipos d'alimentos pa mantener una dieta saludable.

La pirámide clasifica a los alimentos en diferentes niveles, dependiendo de la frecuencia cola que podamos consumir un alimentu.
Asina, na base de la pirámide, ye dicir el quintu nivel, taríen los alimentos que tenemos que consumir a diariu: el pan, los cereales, los arroces y la pasta.

Nel cuartu nivel de la pirámide, tamién habría alimentos que consumimos tolos díes, como son les frutes y les verdures.

Nel tercer nivel, encontramos alimentos que consumimos con frecuencia; alimentos como la lleche, los yogures, el quesu, los güevos, el pescáu, el pollu y los frutos secos.

Nel segundu nivel, tán los alimentos que se consumen de forma ocasional: les carnes encarnaes y los embutíos.

Finalmente, llegamos al primer nivel de la pirámide, na qu'hai alimentos que debemos consumir mui de vez en cuando. Estos alimentos son los dulces y les grases.

Agora que yá sabéis la estructura d'una pirámide d'alimentos, vais tener qu'ayudame a clasificar dalgunos d'ellos. Pinchái na imaxe de la pirámide.

QUIERO SER BOMBERA

Entamamos la selmana con enerxía, de la mano de "Pop Piquiñín". Pop Piquiñín ye'l nome que recibe'l proyeutu musical en llingua asturiana del grupu de pop familiar "Petit Pop".

Pop Piquiñín torna (traduz) al astuarinu los cantares castellanos de la banda col oxetivu de favorecer l'aprendimientu y la tresmisión de la llingua a traviés de la música..

El cantar que vais escuchar darréu (a continuación), llamáu "Quiero ser bombera", trata sobre toles coses que fadrá una moza cuando consiga alcanzar el so suañu de ser bombera. Pinchamos sobre la imaxe pa sentilu.

Dempués d'escuchada la canción, vais garrar una fueya en blancu y contestame a estes dos entrugues:

1. ¿Qué profesión vos gustaría tener cuando fuerais mayores?
2. ¿Por qué garrasteis esa profesión?

Espero con ansia les vuestres respuestes.

PROYECTU "LA COCINA": EL DRAGÓN CHEF

¿SABÉIS CÓMO S'INVENTARON LES PALOMITES?

Cuenta la lleenda qu'había un cuélebre ruinucu que quería deprender a cocinar y ... vaya, escaecióseme (olvidóseme) como sigui la historia. Vais tener que pinchar na imaxe pa descubrilo

Esti cuentín tan prestosu tien una carauterística que lu diferencia d'otros cuentos, y ye l'usu de pictogrames.

Los pictogrames son dibuxos que representen idees, oxetos o conceutos que nos ayuden a comprender meyor el cuentu. Son una forma visual d'aprendizaxe.

Vamos facer una actividá rellacionada colos pictogrames; pa ello pinchái na pallabra PICTOGRAMES

SOPA DE LLETRES

Durante estes vacaciones de Selmana Santa tuvi lleendo a esgaya y tamién tuvi faciendo unes cuantes sopes de lletres d'estremaes temátiques. De fechu fici una sopa de lletres per cada día de la selmana

¿Qué voz paez si-y dedicáis unos minutinos a facer esta sopa de lletres de los siete díes de la selmana?
Pinchái nel mensaxe d'abaxo pa entamar cola sopa

ENTAMA' L TERCER TRIMESTRE

Bonos díes escolinos y escolines, el blog tuvo paráu durante les vacaciones, pero yá va siendo hora de ponelu en marcha

Güei voi descubrir lo observadores que sois. Pa ello, pondrévos dos dibuxos nos qu'hai unes cuantes diferencies, y deberéis llocalizar eses diferencies y escribímeles nuna fueya de papel.

Nos dibuxos apaez un mar bravu con foles, dos estrelles, ñubes, una gavilueta, una palmera, roques y arbustos. Anque a simple vista pueda paecevos que los dos dibuxos son idénticos, en realidá van tener seis diferencies 

¿CUÁLES SON?

PINCHÁI SOBRE LOS DIBUXOS P'AGRANDALOS

1)                                                                                             4)
2)                                                                                             5)
3)                                                                                             6) 

ÚLTIMO DÍA DE CLAS

Güei fina la selmana y con ello entamen les vacaciones de Selmana Santa. Foi un trimestre raru, nel que les circustancies ficieron que llevemos ventidós díes ensin dir al colexu; pero el sol terminará saliendo pel horizonte y esta situación, na que nun podemos salir de casa pa protexer la nuestra salú, acabará siendo un recuerdu pasáu.

Quiero deseavos de too corazón unes bones vacaciones y recordavos qu'hai una montonera de coses que podemos facer ensin falta de salir de casa: ayudar a la familia coles coses de la casa, facer dalguna cuentuca matemática pa que nun se nos escaeza (olvide), dibuxar, ver dalgo la tele, lleer un bon cuentu. Nesti sentíu quiero facevos vos recomendaciones personales:

1º El gobiernu d'Asturies y la TPA impulsen un programa educativu pa televisión que comienza a emitise güei vienres 3 d'abril. El programa tendrá una hora de duración y podrá vese de llunes a vienres de 10:30 a 11:30 na canal A7, y una hora más tarde, de 11:30 a 12:30 na A8.
                                    ¡NUN VOS LO PERDÁIS!


2º Estos díes, nos que nun podemos visitar les biblioteques nin dir a les llibreríes a mercar llibros, tenemos la fortuna de que delles editoriales dannos la posibilidá de facer dalgunes llectures online, a traviés del ordenador o de la tablet. Una d'estes editoriales ye PINTAR PINTAR

                    CUENTOS DE LA EDITORIAL PINTAR-PINTAR

Nesta páxina web, los llibros tán dividíos en dos categoríes: cuentos en castellán y cuentos n'asturianu.
Tenéis 13 llibros en llingua asturiana, de los cuales vos voi recomendar dos d'ellos:

 AMELIA
Historia perguapa d'una güela que vive cola so fía y la nieta, na que se resalta la importancia de la familia y como los llibros puen ser una ayuda pa mantener unida a los miembros de la familia.

 PÁXINES DEL DIARIU DE SIMÓN
Simón tien un diariu y entama a escribir n'él ¿Queréis saber de qué coses escribi Simón nel diariu? Pa ello, vais tener que lleer el cuentu.










ESPERO VOLVER A VEVOS BIEN PRONTO.
UN ABRAZU DEL VUESTRU MAESTRU DE LLINGUA ASTURIANA.

LES CONTACCIONES "NEL", "NA", "NOS" Y "NES"

¿SUÉNAVOS ESTI TROCÍN DE CANCIÓN?

Rellámpagos a esgaya
vense nel cielu 
qu'allumen venti bruxes
en plenu vuelu

Efeutivamente, esti cachín de lletra pertenez al cantar "UNA DE MIEU".
Si nos fixamos nel segundu versu del cantar, alcontraréis dalgo que vimos delles vegaes en clas: les contracciones

Vense NEL cielu

Nel ye un claru exemplu de contracción. La contracción ye un fenómenu nel que dos pallabres redúcense a una sola, y nesa reducción produzse una perda de lletres.

Nel exemplu del cantar, nel ye una contracción de les pallabres en el. Pero nel nun ye la única contracción que yá vimos en clas ¿verdá? Nesta tabla que vos pongo debaxo, incluyo más contracciones que fuimos viendo a lo llargo d'esta segunda evaluación:

Pues agora vais facer una actividá llamada l'árbol de les contracciones.
Lo primero de too tendréis que dibuxar nuna fueya en blancu, un árbol pergrande (va tener que ser pergrande porque dempués escribiremos oraciones dientro d'él), con un tueru (troncu) anchu y cuatro rames gorduques. Amás del troncu y de les rames, anadiréis una copa al árbol.

Una vegada dibuxáu l'arbol, habrá que rellenalu con contracciones. Pa ello vais siguir los siguientes pasos:

          1. Escribir nel tueru (troncu) del árbol la pallabra EN

          2. Poner en cada rama un artículu diferente. Na primer 
               rama "el", na segunda rama "la", na tercer rama "los" 
               y na cuarta rama "les". 

          3. Dividir mentalmente la copa del árbol en cuatro 
               partes. Cada parte va corresponder a una de les 
               rames.

          4. Escribir en cada parte de la copa del árbol una 
               oración na que s'incluya una de les cuatro 
               contracciones de la tabla d'enriba.

Pa que nun tengáis problemes n'entender tolo qu'acabo dicir, inclúyovos debaxo un exemplu concretu de lo que quiero que faigáis.

Esti ye un árbol dibuxáu por mi nel que fui escribiendo na copa del árbol oraciones nes qu'apaecieran les contracciones de la tabla. Escribo debaxo les oraciones por si nun les veis bien na foto

Nel: Escribí nel enceráu.
Na: Toi na cocina.
Nos: Hai comida nos estantes.
Nes: Tamos nes duches.

Pues agora ye'l momentu nel que vosotros y vosotres vais crear el vuestru árbol de les contracciones. Podéis tomar como referencia la estructura del mio árbol, pero les oraciones tenéis qu'inventales vosotros, nun podéis copiar les míes.

Cuando finéis el dibuxu del árbol de les contracciones, facéi una foto al árbol y mandámelo por corréu, que prestaríame a esgaya ver les vuestres obres d'arte.